14 Jan ԼՈՅՍ ՏԵՍԱՒ ՏԱՐՕՆ ԵՒ ՏԱԹԵՒԻԿ «ԱՂԱՒՆՈՅ ՎԱՆՔ» ՄԱՆԿԱՊԱՏԱՆԵԿԱՆ ՊԱՏՄՈՒԱԾՔԻ ԳՐՔՈՅԿԸ
Ուրախ ենք յայտնելու, որ հրամանաւ Գանատայի Հայոց Թեմի Առաջնորդ Գերաշնորհ Տ. Բաբգէն Արքեպիսկոպոս Չարեանի եւ հրատարակութեամբ Ազգային Առաջնորդարանիս Հայեցի Դաստիարակութեան բաժանմունքին, լոյս տեսաւ ՏԱՐՕՆ ԵՒ ՏԱԹԵՒԻԿ «ԱՂԱՒՆՈՅ ՎԱՆՔ» մանկապատանեկան պատմուածքի գրքոյկը: Սոյն գրքոյկին պատմութեան յղացումը կը պատկանի Վահագն Գարագաշեանին, ներշնչուած՝ Յովհաննէս Թումանեանի համանուն բանաստեղծութիւնէն, իսկ նկարազարդումը՝ Սիլվա Խաչերեանին:
Բոլոր սերունդներուն, բայց մանաւանդ մեր աշակերտներուն համար դաստիարակչական բովանդակութեամբ այս հատորը, իր ներդիրին ունի նաեւ նոյն բովանդակութեամբ ու նկարազարդումներով պատրաստուած մանկական շարժապատկեր մը, որ պատրաստուած է Հայաստան, մեկենասութեամբ՝ «Մանուկ Չուխաճեան» ընտանեկան հիմնադրամին: Շարժապատկերին մէջ Տաթեւիկին ձայնը կը մարմնաւորէ Արազ Չարեանը, իսկ Տարօնին ձայնը՝ Ռուբէն Գարայեանը:
Մանկապատանեկան շունչով ու մանկավարժական սկզբունքներով պատրաստուած այս գրքոյկը թող ըլլայ օժանդակ նոր սերունդին հայեցի դաստիարակութեան:
Մանկապատանեկան այս գրքոյկէն եւ խտասալիկէն օրինակ մը ունենալու համար, կրնաք կապուիլ Ազգային Առաջնորդարան` (514)856-1200 թիւին եւ կամ ապսպրելու համար գրել prelacy@armenianprelacy.ca հասցէին։ Հատավաճառ $20:
