Հոգեշնորհ Տ. Ստեփանոս Վրդ. Փաշայեան
Կը նշանակուի Ս. Աստուածածին Հայց. Առաքելական Եկեղեցւոյ
Հոգեւոր Հովիւ
Ն.Ս.Օ.Տ.Տ. Արամ Ա. Վեհափառ Հայրապետի տնօրինութեամբ, Հոգեշնորհ Տ. Ստեփանոս Վրդ. Փաշայեան, նշանակուեցաւ Հոգեւոր Հովիւ Ս. Աստուածածին Հայց. Առաքելական Եկեղեցւոյ։ Կիրակի, 16 Նոյեմբեր 2014-ին Հայր Սուրբը մատուցեց իր անդրանիկ Սուրբ եւ Անմահ Պատարագը Թորոնթոյի մէջ եւ պաշտօնապէս ստանձնեց նոյն եկեղեցւոյ մնայուն Հոգեւոր Հովիւի պաշտօնը:
Աւազանի անունով՝ Գէորգ։ Ծնած՝ 13 Ապրիլ 1981-ին, Պէյրութ։ Նախնական ուսումը ստացած է Նոր-Սիսի Ազգային «Աքսոր Գասարճեան» Վարժարանէն ներս։ 1993-94 տարեշրջանին ընդունուած է Մեծի Տանն Կիլիկիոյ Կաթողիկոսութեան Դպրեվանքը, եւ հնգամեայ Ժառանգաւորաց բաժինը աւարտելով, 27 Յունիս 1998-ին, ձեռամբ Գերշ. Տ. Եփրեմ Արք. Թապագեանի ձեռնադրուած է Կիսասարկաւագ։ 21 Մայիս 2000-ին, ձեռամբ Գերշ. Տ. Զարեհ Արք. Ազնաւորեանի ձեռնադրուած է Սարկաւագ։ 2002-ին, յաջողութեամբ աւարտելով աստուածաբանական-հայագիտական քառամեայ Ընծայարանի բաժինը, Արամ Ա. Վեհափառ Հայրապետի բարձր տնօրինութեամբ որպէս Սարկաւագ, 2 տարի Դպրեվանքէն ներս ստանձնած է Տեսուչի օգնական պաշտօնը։
6 Յունիս 2004-ին, Ն.Ս.Օ.Տ.Տ. Արամ Ա. Վեհափառ Հայրապետի օրհնութեամբն ու բարձր տնօրինումովը, ձեռամբ Թեհրանի Հայոց Թեմի Բարեջան Առաջնորդ՝ Գերշ. Տ. Սեպուհ Սրբ. Արք. Սարգիսեանի, ստացած է Քահանայական ձեռնադրութիւն եւ օծում, ինչպէս նաեւ վեղարի տուչութիւն, վերանուանուելով՝ Տ. Ստեփանոս Աբեղայ։ Շուրջ 3 տարիներ նշանակուած է Ատրպատականի Հայոց Թեմէն ներս որպէս Ուրմիոյ Հոգեւոր Հովիւ։ Հոգշ. Հայր Սուրբը Կաթողիկոսարանի զանազան բաժանմունքներէն ներս պաշտօններ ստանձնած է, ինչպէս Դպրեվանքի Հսկիչ, Լուսարարապետի Օգնական, Թանգարանի Տեսուչ, եւայլն․․․։
22 Նոյեմբեր 2009-ին, ձեռամբ Թեհրանի Հայոց Թեմի Առաջնորդ՝ Գերշ. Տ. Սեպուհ Սրբ. Արք. Սարգիսեանի, ստացած է Վարդապետական Գաւազանի Տուչութիւն։ 24 Դեկտեմբեր 2011-ին, Արամ Ա. Վեհափառ Հայրապետի սրբատառ կոնդակով ստացած է Լանջախաչ՝ առ ի գնահատութիւն իր ծառայական ասպարէզէն ներս։ 2013 տարուան Օգոստոս ամսուընէ սկսեալ նշանակուած է Յունաստանի Հայոց Թեմէն ներս որպէս Թեսաղոնիկէի (Սելանիկի) Հոգեւոր Հովիւ։
Հայր Սուրբին կը մաղթենք յաջող առաքելութիւն Գանատայի մէջ։
